بقلم / محمود جنيدى 

** * ** * ** * ** * **

((**(( الفلانتــــــين ))**))

************************

قالوا النهارده " عيد الحب " ..

قلت يعنى إيه مش فاهم ..

قالولى طبعا عشان فلاّح ..

قلتلهم وامّى مكانتش هانم ..

قالوا ده إسمه " الفلانتاين " ..

قلتلهم متكلمونى عربى أحسن ..

قالوا يعنى عيد الحب ..

يعنى تجيب لحبيبتك هدية حلوة ..

وهى تسمّعك أحلى غنوة ..

قلت والله العظيم دى بلوى ..

طب اشمعنى النهارده يعنى ..

ياناس فوقوا بقى م الغفلة ..

من إمتى الحب كان له عيد 

والاّ بيعملوله حفلة ..

الله !!

يعنى تحب بس يوم واحد ؟؟

طب وباقى الأيام إيه ؟؟

حتبقى فيهم جاحد ..؟؟

هو " قيس " اما حب " ليلى " 

جابلها وردة ؟؟

و" عنتر " أما حب " عبلة " ،

حبها ليلة واحدة ؟؟

الحب ياناس إحساس ..

لا له أول ولا آخر ..

شئ بيسيطر ع القلوب وع المشاعر ..

إحساس بيخلى الأمّى يبقى شاعر ..

كل لحظة تقرّب بين الأحبة 

تبقى لحظة حب ..

كل كلمة تنقال بين الحبايب 

تبقى كلمة حب ..

كل نظرة من عين الحبيب للحبيبة 

تبقى نظرة حب ..

كل همسة من شفايف الحبيبة للحبيب 

تبقى همسة حب ..

كل يوم يلوّنه إحساسنا بلون الحب 

يبقى عيد للحب ..

مش تقولوا " فلانتين " ؟؟

طب يعنى إيه بالله عليكم " فلانتين ..

طب هو مين ؟؟

بوّظتوا شكل الحب ليه .؟؟

ضيعتوا طعم الحب ليه .؟؟

روحوا منكوا لله كلّكم ..

ياللى بدعتوا " الفلانتين " ..

ومحدش يجيلكم ..

فى " فلانتين ..

*************

2018/2/14