سيد عبدالوهاب
//////////////////////////////////
وَصيّة
إحمد ربك دايماً واشكر
وارضى يابنى بالموجود
إوعاك تبخل مهما هايحصل
علم نفسك معنى الجُود
وان يوم همّك عكّر دمّك
إدعى وصلّى ركوع وسجود
طهّر قلبك واسأل ربك
ربك يابنى سميع موجود
قدّم خِيرك واسعد غِيرك
فعل الطيّب لِيك مـَردُود
واوعى شيطانك يملك أمرك
تمشى طريق أخرِتُه مسدُود
واوعى الدُنيا تغُرّك ثانيه
أصل متاعها يدُوب محدُود
واوعى تنافق تبقى مُنافق
تِلقى الغدر ف لحظة يسُود
واوعاك تِبقى خايف تِلقىٰ
نفسك يابنى طعام لِ أسُود
عاوزك دايماً سَبْع مهيمن
صُوتك يرعب أى قرود
ولا تِتكبّر أو تِتجبّر
ولاتِلبس توب النمرُود
مهما تسافر مهما تعافر
لازم ترجع يوم وتعُود
تدعى لربَّك يغفر ذنبك
يوم ماتقابلُه ف يوم موعود
مهما هاتكبر مش هاتعمّر
عمرك أصلُه يدُوب معدُود
عارف أخرك تسكن قبرك
تبقى تراب ناعم مع دُود
.........................
ليست هناك تعليقات:
إرسال تعليق