آه ياشط الأماني بقلم أسامة جديانه

آه ياشط الأماني
ياتري مين خط أسمك
هو كان واد بيغني
ولا عجبه بس رسمك
ناس كتير من عالم تاني
عدوا بحور لاجل شمسك
شافهم ناس كانوا جيراني
فضلوا يحكوا ويتحاكوا عنك
قولت معقول فيه فى زماني
بسمة أمل مرسومة على شطك
قولت آخد أهلي وخلاني
نيجي نزور لو حتي رملك
شيلت على ضهري الأماني
وآجي أرمي همومي عندك
قالوا لي خلاني وأهلي
شوف حظك واحنا بعدك
شيلت كراتين الأماني
أجرت شقة قريبة منك
وكل يوم الصبح بدري
أرمي الأماني فى حضنك
يمكن تمسح دمع عيوني
اللي روت مياه بحرك
يوم يعدي وييجي التاني
لما خلطت الأماني رملك
لا مسحت عني دموعي
ولا رملة بينت حزنك
قولت أعود تاني لجيراني
واكشفلهم كذبك
اللي سماك واد فكاني
غاوي يفخم فى حضرتك
ولا صياد كان بيعاني
عمره مَباع سمكه علي شطك
لازم أشوفلك أسم تاني
شط الخوف راح يبقي أسمك
هدعي ربي اللي حماني
ونور طريقي وبعدني عنك
مستحيل أعود لك تاني
تحقيق الأماني من ربك
                     (((أسامه جديانه)))