حته منى
بقلم خراط الكلمات اشرف رمسيس
أكتب يا قلم وإياك تهين وتلين
الصح هو الصحيح وإبعد عن التلوين
وصوب صبابك ورد عالايمين
انت سهمك صوابك سطرك يكون فى العين
وضميرك يبقى سابقك يطلع كلامك زين
إتمايل عالسطور وإكتب كمان شطرين
وإياك تكون مكسور خلى حروفك نور
وورد على ياسمين
اكتبها بمحبة فكرنا بأهل زمان
والكلمة لو صعبة ياريت تكون بميزان
واكتب كمان عالوطن وقول يامصر امان
وقول دا صح وغلط وبلاش تحدف ظلط
تلقى الكلام إتظبط وتقول كمان وكمان
اكتب عن احلامك ومرارة الأيام
دا السطر قدامك خليك حصان رهوان
إلهامى اهو جالك زى الأسد سعران
والصفحة داعيالك تكتب مدى الأزمان
إرويها بخيالك ياما فى الخيال ألوان
وبصدق فى كلامك على صفحتك هيبان
اكتب بإحساسك تلقى الكلام ألحان
وياريت كمان تمضى وتقول زمن خوان
تملى بيعلى فى اللى ملوشى امان
وعاملى بيصلى عاملى قال غلبان
إكتب يا قلم قولى ليه الألم صابنى
ليه روحى بتاخدنى وتسبنى انا وحدى
احزانى فى احضانى والدمع على خدى
وأقول يا قلم فينك عن عينى متخبى
وعليك ألف وأدور يا قلمى جاوبنى
وتسمع ندايا إليك وألقاك هناك مرمى
اجرى وأحن عليك تجرى وتكتبلى
ولا كنا يوم اتنين قلمى ياحتة منى
لو روحت اروح انا فين إكتب وكلمنى
راح ييجى يوم وأموت وتموت كمان منى
لكن بين البيوت تلقى كلامنا حى
جوى البيوت مبنى لكنه لا ينهدم
لوكان ورق مبلى ساحر وضد الزمن
والشعرا من قبلى كتبوا الكلام وإتحفظ
وياما قالوا قبلى والفضل كان للقلم
ودا بس من بختى
ليست هناك تعليقات:
إرسال تعليق