بقلم سيد عبدالوهاب
صرخة
يوم ماعيونك مرة تدَمّع
علشان مِن جُوّاك إنسان
يوم ماتحّس بظُلم بيوجع
واللّى عليك طاعة وكتمان
تسكُت علشان تعرف تِسمع
وانّ حقوقك فى النسيان
يوم ماتحّس انّك يامفتّح
محسوب واحد مِ العميان
وانّك تتنازل عن حقك
علشان خايف مِ الطُغيان
وانّ الحق يدُوب أشعار
لكن فى الواقع بُهتان
يومها هاتصرخ صرخة قويّة
صرخة هاتُخرج م الوجدان
صرخة تهزّ جبال الأرض
صرخة هاتفتح أى ميدان
يومها هاتجرى بسرعة تودّع
نعش شهيد ماشى فرحان
يومها سفينتك تُعبر همّك
وتفادى موج الأحزان
يومها هاترفع إيدك عاليه
تدعى وتقول يارحمان
إحنا عبيد ليك وحدك
ترفض تركع لِ الشيطان
صرخة تحقق أحلام يامَا
بيها هانبنى بقى الأوطان
صرخة هاتحلف إن العدل
لازم يبقى مابّينا ميزان
.....................
ليست هناك تعليقات:
إرسال تعليق