((( أد الحلم ))) رآب
لما كل الناس تبقى واقفه ضدك
ومفيش حد فيهم راضى يودك
ولاياخد بأيدك الكل عايز يهدك
والكل قاسى عليك وظلمك
وأقرب الناس ليك عمال يعندك
ولابيفكر فى يوم يسأل عنك
وحاسس أنه مش همه أمرك
تعالى قرب منى وأسمع هاقول لك
أنت يابنى أيوه أنت
ياما دقت على الراس طبول
وعرفنا أيه الفرق بين الكلام الهجص
والكلام الموزون
ومشينا فى سكة دول ودول
وجننا العاقل وعقلنا المجنون
تقدر تقول شعورك أيه
ممكن تجاوب لو مش مشغول
تقدر تفسر كل الكلام المتكسر
ولا تقعد جانب الحيط تتحسر
أوتتحمل وجع فى الرآس
وترسم حلمك على ورق الكراس
وتعلقه على الحيط بمسمار
ممكن تحس فى يوم
أنك طاير فوق النجوم
وأنك قادر تشيل فوق كتافك كوم الهموم
وأنك يوم هتفرح وترقص على المقسوم
على فين هتهرب من المكتوب
وحياتك كلها متاريس وحدود
مش كل شئ مسموح ولاكل شئ مرفوض
لومش شايف فى الدنيا خير
يبقى مفيش لك غير ربك
هو يعزك ولا يذلك
أسأل ربك يستر عرضك
كتر خيركم
كنت مفكر ماليش غيركم
ربك قدر والمتقدر لازم أشوفه بعيونى وأفكر
أرجع تانى للسكه وأقصر
كل طريق كان فيه حركه
ربنا يطرح فيه البركه
كل علامه كل أشاره
أخدها بجد مش بهزار
أنا هامشى فوق النار
أنا مش هاسأل ولاهستفسر
هافضل ماشى لحد خلاصى ولاهتأثر
كل كلام الناس جويا أتكسر
ولاهايهم شوية مدح ولابيضر حتى الذم
طريقى وحلمى هما أهم
أعمل حاجه قبل ما أسلم أو أتندم
كلمات/محمود صلاح السيدد18/4/2017
ليست هناك تعليقات:
إرسال تعليق