فضفضة
مش هاقول عن نفسى شاعر
مش هاقول أنا ابقى مين
دول يادوب حبة مشاعر
ساكنه قلبى من سنين
يوم أحس بضحكه حلوه
ويوم ياناس أبات حزين
يوم أحس بظلم مر
يوم كئيب رافض يمر
ويوم جميل مليان حنين
يوم أكون كدا فهلوى
تقدر تقول عاقل رزين
ويوم أكون برضو غبى
مافهمش حتى كلمتين
يوم أشك ف كل حاجه
ويوم أشوف نور اليقين
يعنى كده بالمختصر
انا ياناس برضو بشر
لحن جميل لحن حزين
لكن على نفس الوتر
ساعات أكون.. صدر حنون
وساعات أكون فعلا خطر
ياما افتريت.. وكمان جنيت
لكن بقى ربك ستر
يمكن أكون.. غاوى جنون
أقول كلام زى المطر
ساعات حروفى بتتسرق
ودمى طبعا يتحرق
وساعات بقول كلام يطول
لكن بيطلع معتبر
يوم أحس بالسعاده
ويوم بيغلبنى المرار
تقدر تقول أنا باختصار
انسان وله... طبعا أعذار
أهى فضفضة بقى والسلام
والفضفضة إيه غير كلام
خارج يدوب من القلوب
وابعت معاه كمان سلام
للى قرا حرفى تمام
أهى فضفضة بقى والسلام
بقلم/سيد عبدالوهاب
ليست هناك تعليقات:
إرسال تعليق