قصائد قصيره 36 *** بقلم السيدابوطاحون
*********
رمشه شاورلي وسمح
دعيت يارب احميه
قلب حبيبي فتح
لقيتني قاعد فيه
*********
كل اللى عشقوا السكات
يقفوا فى صف اللى مات
أما الليالى اللى جيه
فكلها حريه
غنى يا ست البنات
وأحضني الملاغيه
*********
انا بقالى سنين
بحلم اكون عصفور
يمكن اعدى السور
وانام فى حضن النور
*********
ليالي الضلمه تتعبنى
معاك محلاك يبان فنك
نجوم الكون تعذبنى
اجيلك ارتمى ف حضنك
ادوب و الرمش يغلبنى
ومعرفنيش انا منك
*********
أحبك تقولي
تعالي وروحي ..
تصهلل حروفك
وتغزل ملاية حرير
لجل روحي ..
تهدهد صباحي
وتعشق براحي
وتمسح جراحي ..
وأموت لما عطرك
يقوم بإجتياحي ..
وتبنيني تاني
وأحبك كمان !!
*********
ينادي اللحن ع الكلمه ..
يدوب الحب فى الغنوه
ينط الموج على السكه ..
واتارى البحر كان مخدوع
وكان ممنوع
يفوت البحر جوا الدار ..
يحس بنفحة النعمه وبالنغمه
بتتناغم ضفايرها مع الأشجار
نقوم نتوضي
ونصلي صلاة الشكر
تموت الريبة والخيبة ..
ونقسم قسمة الحلوين
*********
نسيتيني
ورحتي بعيد
وسبتيني
غرقت في بحرك الهايج
وشفتيني
وكنت ك ريشه
بتصارع جبال الموج
ما فكرتيش
تمدي ايديكي
تاخديني
في حضنك وأنفاسك
تدفيني
نسيتيني
ورغم القسوه في عنيكي
وحشتيني
*********
ياللي مليت الدنيا كلام
لما خاصمتك ست ايام
قوللي يا روحي بقالك كام
شهر سايبني بدون احلام
*********
لافت و لهفت نص
كشف القمر الجريمه
والنجم كان بيبص
رايحه على فين ياريمه
*********
هرب وبات في الخص
بيقول على نفسه شاعر
وهو في الأصل لص
كداب ومن غير مشاعر
الشعر مش طوب ورص
*********
ليست هناك تعليقات:
إرسال تعليق